Tobias, 19 Jahre
Scho als Chind hani ade Agebot vode reformierte Chile Zug teilgno. De «Kinami» z’Baar isch immer mis Highlight vom Monet gsi. Vo det us bini den au uf s‘HeLa cho. Det bini jedes Jahr als Teilnehmer debii gsi, bis ich den ide erste Oberstufe s’erstmal ha dörfe leite. Zwei Jahr spöter hani de mit 14i s’erste Mal imene Sola dörfe als Jungleiter debii si. En würklichi Heruseforderig, drum hani, zum mich als Leiter witerentwickle, im gsammte 5 Pace-Kürs bsuecht. Jedes Lager und jede Event isch es Erläbnis für sich und e Huufe vo neue Idrück und Erfahrige, öb mit de Teilnehmer oder im Leitigsteam. Es entstönd Insider, Gschichte, Fründschafte aber vorallem schöni Erinnerige. Jedes Lager isch au en wiiteri Chance zum neui Sache z’lerne und sich als Leiter, sowie als Mensch, wiiter z’entwickle. Die «Skills» wo mer sich i somene Setting aeigne cha, sind schwär neumed anderst z’becho. Klar chas mängisch au sträng si und i d’Planig wird oft vill Freiziit und Härzbluet investiert. Doch schlussändlich lohnt sichs immer. Au immer schön sind d’Dankesaläss wo d’Leiter jährlich bsueche dörfed wie z.B. de Sola-Leiterplausch oder de kantonali Merci-Tag.